ខេត្តកណ្តាល — នៅព្រឹកថ្ងៃទី ១៤ សីហា ២០២៥ កម្លាំងនគរបាលខេត្តកណ្តាល បានអនុវត្តប្រតិបត្តិការចុះឡោមព័ទ្ធ និងឃាត់ខ្លួនថៅកែលក់ឡេមានឈ្មោះពេញនិយម “Love Riya” ក្នុងតំបន់ក្រុងតាខ្មៅ។
ប្រតិបត្តិការនេះ បានប្រព្រឹត្តឡើងក្រោមការសម្របសម្រួលពីព្រះរាជអាជ្ញា និងការដឹកនាំបញ្ជាផ្ទាល់ពីឯកឧត្តមស្នងការនគរបាលខេត្តកណ្តាល។ កម្លាំងបានចុះទៅកាន់ផ្ទះស្នាក់នៅរបស់សង្ស័យ ដែលស្ថិតក្នុងបុរី ML ភូមិគ្រឹះ ក្រុងតាខ្មៅ ខេត្តកណ្តាល ហើយអនុវត្តការចាប់ខ្លួនដោយសុវត្ថិភាព។
បន្ទាប់ពីការចាប់ខ្លួន សមត្ថកិច្ចបាននាំយក “Love Riya” ទៅកាន់ស្នងការដ្ឋាននគរបាលខេត្ត ដើម្បីសួរនាំ និងដំណើរការច្បាប់បន្ត។ រហូតដល់ពេលនេះ មិនទាន់មានការបង្ហាញព័ត៌មានលម្អិតពីមូលហេតុនៃការចាប់ខ្លួននោះទេ។
សមត្ថកិច្ចកំពុងបន្តស៊ើបអង្កេត និងនឹងធ្វើការប្រាប់ព័ត៌មានបន្ថែមនៅពេលមានលទ្ធផល៕
