ដោយអនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការដឹកនាំយកចិត្តទុកដាក់ពី ឯកឧត្តម ប្រាក់ សោភ័ណ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាប ព្រមទាំងការបញ្ជារបស់លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប កម្លាំងនគរបាលផែនការងារព្រហ្មទណ្ឌ បានសហការជាមួយអធិការដ្ឋាននគរបាលស្រុកស្វាយលើ ចុះស្រាវជ្រាវនៅកន្លែងកើតហេតុយ៉ាងយកចិត្តទុកដាក់។
តាមការស្រាវជ្រាវ កម្លាំងសមត្ថកិច្ចបានកំណត់មុខសញ្ញា និងតាមចាប់ឃាត់ខ្លួនជនសង្ស័យបានភ្លាមៗ បន្ទាប់ពីជនសង្ស័យបានប្រើកាំភ្លើងខ្លីម៉ាក K54 បាញ់លើជនរងគ្រោះឈ្មោះ អ៊ុត ថៃ ភេទប្រុស អាយុ ៥៥ ឆ្នាំ មុខរបរកសិករ ចំនួន ៤ គ្រាប់ បណ្តាលឲ្យស្លាប់ភ្លាមៗនៅកន្លែងកើតហេតុ មុននឹងរត់គេចខ្លួនចូលព្រៃ ដោយមានកាំភ្លើងជាប់ខ្លួន។
រហូតមកដល់វេលាម៉ោង ៩:៤០ នាទី ថ្ងៃដដែល កម្លាំងនគរបាលបានតាមចាប់ឃាត់ខ្លួនជនសង្ស័យបាននៅចំណុចក្បែររីសតធីសាក់ ជាប់ជើងភ្នំគូលែន ក្នុងភូមិបិតផ្កា ឃុំស្វាយលើ ស្រុកស្វាយលើ ខេត្តសៀមរាប ដែលមានចម្ងាយប្រហែល ២ គីឡូម៉ែត្រពីកន្លែងកើតហេតុ។
ជនសង្ស័យឈ្មោះ ញឹក ម៉ៅ ភេទប្រុស អាយុ ៥៣ ឆ្នាំ មុខរបរកសិករ មានស្រុកកំណើតនៅភូមិគោកអំពិល ឃុំភ្នំសំពៅ ស្រុកបាណន់ ខេត្តបាត់ដំបង និងបច្ចុប្បន្នរស់នៅឃុំស្វាយលើ ស្រុកស្វាយលើ ខេត្តសៀមរាប។ សមត្ថកិច្ចបានដកហូតវត្ថុតាងកាំភ្លើងខ្លីម៉ាក K54 ចំនួន ១ ដើម បង់ ២ និងគ្រាប់ចំនួន ១៦ គ្រាប់។
មូលហេតុ នៃហេតុការណ៍នេះ គឺបណ្តាលមកពីទំនាស់ពាក្យសំដីពាក់ព័ន្ធនឹងការដកបង្គោលព្រំដី។
បច្ចុប្បន្ន ជនសង្ស័យកំពុងត្រូវបានសមត្ថកិច្ចជំនាញធ្វើការសាកសួរតាមនីតិវិធី និងកសាងសំណុំរឿងបញ្ជូនទៅតុលាការ ដើម្បីចាត់ការតាមច្បាប់។
