ខេត្តកំពង់ចាម÷កុមារាអាយុ៧ឆ្នាំម្នាក់ ត្រូវបានជនសង្ស័យកាប់ប្រហារជាច្រើនកាំបិត បណ្ដាលឲ្យរងរបួសក្បាលជាច្រើនកន្លែង នៅយប់ថ្ងៃទី០២ ខែធ្នូ ឆ្នាំ២០២៥ នៅចំណុចភូមិជ្រៃហាយ ឃុំដងក្ដារ ស្រុកស្ទឹងត្រង់ ខេត្តកំពង់ចាម នៅពេលនេះសមត្ថកិច្ចចាប់ខ្លួនជនសង្ស័យបានហើយ ។
របាយការណ៍របស់សមត្ថកិច្ចបានបញ្ជាក់ថា ជនសង្ស័យ មាន ឈ្មោះ សៀត រំលី ភេទប្រុសអាយុ២៩ឆ្នាំ ជនជាតិខ្មែរឥស្លាម មានទីលំនៅភូមិកើតហេតុខាងលើ បានយកអាវុធមុតស្រួច វាយកាប់ទៅលើកុមារាឈ្មោះ កំរី សាអាត់ អាយុ៧ឆ្នាំ មានទីលំនៅភូមិ-ឃុំជាមួយគ្នា បណ្ដាលឲ្យរងរបួសមុតរយះជាច្រើនកន្លែង នៅផ្នែកក្បាល ហើយត្រូវបានក្រុមគ្រួសារនាំទៅសង្គ្រោះនៅមន្ទីរពេទ្យខេត្តកំពង់ចាម ។
ដោយឡែកជនសង្ស័យ ក្រោយធ្វើសកម្មភាពបានរត់គេចខ្លួន លុះដល់ថ្ងៃទី០៣ ខែធ្នូ ឆ្នាំ២០២៥ វេលាម៉ោង១៣:០០នាទីរសៀល កម្លាំងនគរបាលជំនាញបានចាប់ខ្លួនជនសង្ស័យខាងលើ នាំធ្វើការសាកសួរ ហើយជនសង្ស័យបានឆ្លើយសារភាពថា ខ្លួនពិតជាបានប្រព្រឹត្តសកម្មភាពពិតប្រាកដមែន ។
បច្ចុប្បន្នសមត្ថកិច្ចកំពុងកសាងសំណុំរឿង បញ្ជូនទៅសាលាដំបូង ដើម្បីអនុវត្តតាមនីតិវិធី ច្បាប់៕
