ខេត្តកោះកុង៖ នៅថ្ងៃទី ១ ខែ តុលា ឆ្នាំ ២០២៥ នៅទីបញ្ជាការ តំបន់ប្រតិបត្តិការសឹករងកោះកុង យោធភូមិភាគទី៣មានរៀបចំពិធីបើកវគ្គហកវឹកហ្វឺន បំប៉នពង្រឹងសមត្ថភាពយោធា ឆ្នាំ២០២៥ ប្រកាសតែងតាំងផ្លាស់ប្តូរមុខងារ និងបំពាក់ឋានន្តរសក្តិជូន នាយទាហាន នាយទាហានរង របស់ អង្គភាពតំបន់ប្រតិបត្តិការសឹករងកោះកុង ។
កម្មវិធីដែលពិធីនេះប្រព្រឹត្តទៅ ក្រោមអធិបតីភាព ឯកឧត្តម ឧត្តមសេនីយ៍ទោ អ៊ុយ ហៀង មេបញ្ជាការយោធភូមិភាគទី៣ ។
មានមតិសំណេះសំណាលក្នុងឱកាសនោះ ឯកឧត្តម ឧត្តមសេនីយ៍ទោ អ៊ុយ ហៀង មេបញ្ជាការ យោធភូមិភាគទី៣ បានថ្លែងនូវការកោតសរសើរ ចំពោះបងប្អូនកងទ័ពយើងដែលកន្លងមកបាន ធ្វើពលិកម្មគ្រប់បែបយ៉ាង ឆ្លងកាត់គ្រោះថ្នាក់ និងឧបស័គ្គគ្រប់ជំពូកដើម្បីបុព្វហេតុការពារបូរណភាពទឹកដី ការពារជាតិ សាសនា ព្រះមហាក្សត្រ ។ ឯកឧត្តមបានរំលឹកឡើងវិញអំពីព្រឹត្តិការសំខាន់ថ្មីៗ តាមខ្សែបន្ទាត់ព្រំដែនកម្ពុជា.ថៃដែលត្រូវបានរងនូវការឈ្លានពានពីសំណាក់ភាគីថៃមកលើ បូរណភាពទឹកដីកម្ពុជា ក្នុងនោះដែរ ដោយគោរពតាមបទបញ្ជាដ៏ខ្ពង់ខ្ពស់របស់ ថ្នាក់លើ កងទ័ព អង្គភាពតំបន់ប្រតិបត្តិការសឹករងកោះកុងបានឈរជើង ការពារបូរណភាពទឹកដី ប្រកបដោយ ឆន្ទៈស្នេហាជាតិមុះមុត អង់អាចក្លាហាន និង ប្រកបដោយស្មារតី គោរពវិន័យ និងបទបញ្ជាយ៉ាងម៉ឺងម៉ាត់ ។ បច្ចុប្បន្នកងទ័ពយើងសហការជាមួយ អង្គភាពនានាឈរជើងការពារ បណ្តាមុខព្រួញដែលទទួលខុសត្រូវបានយ៉ាងរឹងមាំ។
.
ឯកឧត្តមក៏បានផ្តាំផ្ញើដល់នាយទាហាន នាយទាហារង ដែលត្រូវបានប្រកាសតែងតាំងផ្លាស់ប្តូរមុខងារ និងបំពាក់ឋានន្តរសក្តិថ្មី ត្រូវខិតខំគោរពវិន័យ បទបញ្ជា របស់កងយោធពលខេមរភូមិន្ទ គោរពច្បាប់របស់រដ្ឋ និង បទបញ្ជា របស់ថ្នាក់លើ យកចិត្តទុកដាក់កសាងនិងពង្រឹងអង្គភាព ពង្រឹងសាមគ្គីភាពផ្ទៃក្នុងឲ្យបានរឹងមាំ ចូលរួមក្នុងចលនា បង្កបង្កើនផលនិងចិញ្ចឹមសត្វ ចេះថែរទាំសុខភាពជាប្រចាំ ជាពិសេសយកចិត្តទុកដាក់ចុះជួយបងប្អូនប្រជាពលរដ្ឋដែលជួប ការលំបាក ជួបគ្រោះធម្មជាតិ ជុំវិញមូលដ្ឋានដែលអង្គភាព កំពុងឈរជើង ក្នុងកាលៈទេសៈបច្ចុប្បន្ន ។
.
ឯកឧត្តមបានសង្កត់ធ្ងន់ថា៖ ការបើកវគ្គហ្វឹកហ្វឺនបំប៉នសមត្ថភាពយោធា នាពេលគឺដើម្បីអោយយោធិនគ្រប់រូបកាន់តែមានសមត្ថភាពគ្រប់គ្រាន់ក្នុងការំពេញភារកិច្ច ម្យ៉ាងវិញទៀតចំពោះប្អូនៗ ដែលទទួលបាននូវការផ្លាស់ប្តូរមុខងារ និង បំពាក់ឋានន្តរសក្តិថ្មីនៅពេលនេះ គឺជាការបង្កើននូវស្មារតីទទួលខុសត្រូវខ្ពស់បន្ថែមទៀតចំពោះ មុខងារ និង ភារកិច្ចថ្មី ដើម្បីឲ្យសក្តិសមនិងទំនុកចិត្តរបស់ថ្នាក់ដឹកនាំ ដូច្នេះប្អូនៗត្រូវពង្រឹងគោលលជំហរ សតិអារម្មណ៍រឹងមាំ ស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ ចំពោះរាជរដ្ឋាភិបាលស្របច្បាប់ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ប្រឆាំងដាច់ខាត ការធ្វើបដិវត្តន៍ពណ៌ របស់ពួកជនក្បត់ជាតិមួយក្តាប់តូច ដែលចង់ផ្តួលរំលំរាជរដ្ឋាភិបាល ផ្តួលរំលំរបបរាជានិយមនៅកម្ពុជា ជាមួយនឹងការតស៊ូ ប្រយុទ្ធការពារបូរណភាពទឹកដី និងប្រជាពលរដ្ឋ ដើម្បីសុខសន្តិភាពជូនជាតិទាំងមូល .។
