លោក ឥន្ទ មណ្ឌល អធិការនៃអធិការដ្ឋាននគបាលក្រុងដូនកែវ បានថ្លែងឲ្យដឹងថា កាលថ្ងៃទី២៨ ខែខែវិច្ឆិកា ឆ្នាំ២០២៥ វេលាម៉ោង១៩និង៣០នាទី នៅចំណុចមុខផ្ទះរបស់ឈ្មោះ នាង លីម៉េង ដែលស្ថិតនៅក្នុងភូមិធន់មន់ខាងត្បូង សង្កាត់បារាយណ៍ ក្រុងដូនកែវ មានករណីមួយបានកើតឡើងបង្កដោយជនសង្ស័យមានចំនួន០៥នាក់ ទី១ ឈ្មោះ នាង លីម៉េង ភេទស្រី អាយុ៤០ឆ្នាំ មុខរបរមេផ្ទះ(ប្រពន្ធចុង)។ ទី០២ ឈ្មោះ នាង ផារី ភេទស្រី អាយុ៣៥ឆ្នាំ មុខរបរកសិករ។ ទី០៣ ឈ្មោះ វី សៀវម៉ី ភេទស្រី អាយុ១៩ឆ្នាំ មុខរបរលក់ដូរ។ និងទី០៤ ឈ្មោះ វី ឈុនឈី ភេទប្រុស អាយុ១៨ឆ្នាំ មុខរបរសិស្សនាក់ បានធ្វើសកម្មភាព ព្រួតគ្នាវាយទៅវិញទៅមក និងចាក់សាំងដុតទៅលើភាគីម្ខាងទៀតដែលជាជនរងគ្រោះមានឈ្មោះ លីម ឡៃហុន ភេទស្រី អាយុ៤០ឆ្នាំ មុខរបរកសិករ(ប្រពន្ធដើម) ទីលំនៅបច្ចុប្បន្នភូមិ សង្កាត់ កើតហេតុ ។
លោកអធិការក្រុងបានបន្ថែមថា សកម្មភាពនេះបានបណ្ដាលឱ្យឆេះរងរបួសជនរងគ្រោះដោយរងរបួសជាច្រើនកន្លែងត្រង់ត្រចៀកខាងឆ្វេង លើកញ្ចឹង ក លើខ្នងផ្នែកខាងលើ លើស្មាខាងឆ្វេង រងរបួសលើខ្នងទាំងសងខាងចំនួន០២កន្លែង និងមានស្នាមរងរបួសនៅលើសាច់ដុំខាងឆ្វេងចំនួន០១កន្លែង(រងរបួសភ្លើងឆេះធ្ងន់ធ្ងរ) ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្តតាកែវ ។
បើតាមលោកអធិការក្រុងដូនកែវ ភាគីម្ខាងទៀត មានឈ្មោះ នាង លីម៉េង រងរបួសត្រង់កផ្នែកខាងឆ្វេងចំនួន០១កន្លែង (រងរបួសស្រាល) និងទី០២ មានឈ្មោះ វី សៀវម៉ី រងរបួសលើសាច់ដុំខាងស្ដាំចំនួន០១កន្លែង(រងរបួសស្រាល) ។
ក្រោយកើតហេតុកម្លាំងជំនាញនៃអធិការដ្ឋាននគរបាលក្រុងដូនកែវ កម្លាំងប៉ុស្តិ៍នគរបាលរដ្ឋបាលបារាយណ៍ បានចុះដល់កន្លែងកើតហេតុធ្វើការស្រាវជ្រាវឈានដល់ការឃាត់ខ្លួនឈ្មោះ នាង លីម៉េង យកមកធ្វើការសាកសួរនៅអធិការដ្ឋាននគរបាលក្រុងដូនកែវ។ ចំណែកបក្ខពួកផ្សេងទៀតបានរត់គេចខ្លួន លុះដល់ថ្ងៃទី២៩ ខែវិច្ឆិកា ឆ្នាំ២០២៥ វេលាម៉ោង១៦ និង៣០នាទី កម្លាំងជំនាញនៃអធិការដ្ឋាននគរបាលក្រុងដូនកែវ កម្លាំងប៉ុស្តិ៍នគរបាលរដ្ឋបាលបារាយណ៍ បានធ្វើការស្រាវជ្រាវឈានដល់ការឃាត់ខ្លួនបក្ខពួកបានចំនួន០៣នាក់ផ្សេងទៀត យកមកអធិការដ្ឋាននគរបាលក្រុងដូនកែវ ដើម្បីធ្វើការសាកសួរ ។
លោក ឥន្ទ មណ្ឌល បានបន្ថែមថា ក្រោយធ្វើការសាកសួរដោយអនុវត្តតាមបទបញ្ជាយ៉ាងម៉ឺងម៉ាត់ពីសំណាក់ លោកឧត្ដមសេនីយ៍ទោ ម៉ែន លី ស្នងការនគរបាលខេត្តតាកែវ និងមានការសម្របសម្រួលនីតិវីធីពីលោក ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ កម្លាំងជំនាញ នៃអធិការដ្ឋាននគរបាលក្រុងដូនកែវ ធ្វើការកសាងសំណុំរឿងបញ្ជូនទៅសាលាដំបូងខេត្តអនុវត្តតាមនីតិវិធីច្បាប់ ៕
