ខេត្តតាកែវ៖ ករណីឃាតកម្មក្នុងគ្រួសារ បន្ទាប់ពីបុរសជាប្តីបានប្រើកាំបិតចាក់ប្រពន្ធរបស់ខ្លួនប្រមាណ៥កាំបិត បណ្តាលឱ្យស្លាប់នៅនឹងកន្លែង ហើយក្រោយធ្វើសកម្មភាពបានជិះម៉ូតូរត់គេចខ្លួន។ ទោះជាយ៉ាងណា ជនសង្ស័យត្រូវបានសមត្ថកិច្ចស្រាវជ្រាវតាមចាប់ខ្លួនបាននៅខេត្តព្រៃវែង។
ករណីនេះបានកើតឡើងនៅវេលាប្រមាណ ម៉ោង១១ព្រឹក ថ្ងៃទី៧ ខែសីហា ឆ្នាំ២០២៦ ស្ថិតនៅ ភូមិដកវ៉ាន ឃុំឧត្តមសូរិយា ស្រុកត្រាំកក់ ខេត្តតាកែវ។
ជនរងគ្រោះឈ្មោះ និល ចាន់សុភា ភេទស្រី អាយុ៥០ឆ្នាំ ត្រូវបានរាយការណ៍ថា ត្រូវប្តីឈ្មោះ ជុំ ផូ អាយុ៤៨ឆ្នាំ ប្រើកាំបិតចាក់ប្រមាណ៥កាំបិត បណ្តាលឱ្យស្លាប់នៅកន្លែងកើតហេតុ។
ក្រោយកើតហេតុ ជនសង្ស័យបានជិះម៉ូតូ Dream C125 ពណ៌ខ្មៅ ផលិតឆ្នាំ២០២០ ពាក់ផ្លាកលេខ តាកែវ 1V-4858 រត់គេចខ្លួន។
អ្វីដែលកាន់តែធ្វើឱ្យមហាជនមានការភ្ញាក់ផ្អើល គឺមូលហេតុដំបូងដែលត្រូវបានរាយការណ៍ថា នាំឱ្យកើតមានជម្លោះក្នុងគ្រួសារ គឺ«ពាក់ព័ន្ធនឹងរឿងប្រពន្ធមិនបានដាំបាយឱ្យប្តីហូប»។ ទោះជាយ៉ាងណា ចំណុចនេះនៅត្រូវរង់ចាំការបញ្ជាក់ជាផ្លូវការពីសមត្ថកិច្ច ក្រោយការសាកសួរ និងការស្រាវជ្រាវបន្ថែម។
សមត្ថកិច្ចបើកប្រតិបត្តិការតាមចាប់ភ្លាមៗ ក្រោយទទួលបានព័ត៌មាន លោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង បានចង្អុលបង្ហាញ និងដាក់បទបញ្ជាឱ្យកម្លាំងជំនាញចាត់វិធានការស្រាវជ្រាវ តាមស្វែងរក និងចាប់ខ្លួនជនសង្ស័យឱ្យបានឆាប់បំផុត។
ក្រោមការដឹកនាំរបស់លោកវរសេនីយ៍ទោ ស៊ុំ សីហា អធិការនគរបាលស្រុកពារាំង កម្លាំងនគរបាលស្រុកពារាំងបានសហការជាមួយកម្លាំងនគរបាលខេត្តតាកែវ និងកម្លាំងនគរបាលទូទាំងខេត្តព្រៃវែង ដោយរាយកម្លាំងតាមគោលដៅ និងតាមច្រកល្ហកនានា ដើម្បីស្វែងរកជនសង្ស័យ។
ជាលទ្ធផល តាមរយៈការស្រាវជ្រាវ និងកិច្ចសហការរបស់កម្លាំងសមត្ថកិច្ច ជនសង្ស័យត្រូវបានរកឃើញ និងចាប់ខ្លួនបាននៅក្នុងខេត្តព្រៃវែង ហើយត្រូវបាននាំខ្លួនមកកាន់សមត្ថកិច្ច ដើម្បីបន្តនីតិវិធី។
បច្ចុប្បន្ន ជនសង្ស័យត្រូវបានឃាត់ខ្លួន ដើម្បីធ្វើការសាកសួរ និងកសាងសំណុំរឿងបញ្ជូនទៅតាមនីតិវិធីច្បាប់។
ករណីនេះក៏ជាសារដាស់តឿនដ៏សំខាន់ដល់គ្រួសារគ្រប់រូបថា ជម្លោះក្នុងគ្រួសារ ទោះចាប់ផ្តើមពីបញ្ហាតូចតាចប៉ុណ្ណាក៏ដោយ មិនគួរប្រើអំពើហិង្សាជាដំណោះស្រាយឡើយ។ ការខឹង ការប្រកែក ឬការមិនយល់គ្នា គួរត្រូវបានដោះស្រាយតាមការពិភាក្សា និងការអត់ធ្មត់ ព្រោះអំពើហិង្សាមួយពេល អាចបំផ្លាញជីវិតមនុស្សម្នាក់ និងបន្សល់ទុកសោកនាដកម្មដល់គ្រួសារទាំងមូល។
ចំពោះមូលហេតុ និងដំណើររឿងលម្អិតនៃអំពើឃាតកម្មនេះ សមត្ថកិច្ចកំពុងបន្តស្រាវជ្រាវ និងបំភ្លឺ ដើម្បីកំណត់ការពិត និងចាត់ការជនសង្ស័យតាមច្បាប់៕
