ខេត្តកំពង់ស្ពឺ÷កម្លាំងនគរបាលនៃអធិការដ្ឋាននគរបាលស្រុកគងពិសី សហការជាមួយកម្លាំងនគរបាលប៉ុស្តិ៍ បានធ្វើការ ឃាត់ខ្លួនជនសង្ស័យ ២នាក់ (បងប្អូនបង្កើត) ករណីវាយបំផ្លិចបំផ្លាញទ្រព្យសម្បត្តិអ្នកដទៃ ។
ដោយបានការបញ្ជាដឹកនាំដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងអធិការនគរបាលស្រុកគងពិសី ទទួលបានសេចក្ដីរាយការណ៍ពីពលរដ្ឋលេីករណីវាយបំផ្លិចបំផ្លាញទ្រព្យសម្បត្តិអ្នកដទៃ ដោយជនបង្កមានកាន់ដំបង កាំបិត គំរាមថានិងសម្លាប់ចោលស្ថិតនៅចំណុចភូមិត្រពាំងមាន ឃុំស្នំក្រពើ ស្រុកគងពិសី ។
លោកវរសេនីយ៍ឯក យ៉ាង សុខលី អធិការនគរបាលស្រុកគងពិសីបានឱ្យដឹងថា នៅថ្ងៃទី៨ ខែកុម្ភៈ ឆ្នាំ២០២៦ វេលាម៉ោង០៣និង៤០នាទីទាបភ្លឺ ជនសង្ស័យ២នាក់បងប្អូនបង្កើត (១)-ឈ្មោះ ឃឹម ភារ៉ាក់ ភេទប្រុស អាយុ២៩ឆ្នាំ (២)-ឈ្មោះ ឃឹម ភារម្យ ភេទប្រុស អាយុ៣៧ឆ្នាំ រស់នៅភូមិត្រពាំងមាន ឃុំស្នំក្រពើ ស្រុកគងពិសី គ្មានមុខរបរ បានធ្វើសកម្មភាពយកដុំថ្មគប់ វាយបំផ្លិចបំផ្លាញទ្រព្យសម្បត្តិរបស់អ្នករស់នៅជិតខាងប្រអប់គីឡូភ្លើងតាមដងផ្លូវចំនួន៤ប្រអប់ឌីសង់ទ័រចំនួន២៦ អំពូលភ្លើងសូឡាចំនួន៣ កាមេរ៉ាសុវត្ថិភាពចំនួន៤ តូបលក់អីវ៉ាន់ចាប់ហួយ ។
តាមការបញ្ជាក់ពីមូលដ្ឋាន មុខសញ្ញាទាំងពីរនាក់បងប្អូនខាងលើជាមនុសប្រើប្រាស់គ្រឿងញៀន រហូតបានធ្លាប់បញ្ជូនទៅមណ្ឌលកែប្រែបន្សាបសារធាតុញៀន និងបានវិលត្រឡប់មកវិញនៅតែបន្ដលួចប្រេីប្រាស់ រហូតគ្មានសតិអារម្មណ៍អាចគ្រប់គ្រងខ្លួនបាន ភាសាហៅថាបែកថ្នាំ ទាំង២នាក់ជាកូនកំព្រាម្ដាយ ឪពុកមានប្រពន្ធក្រោយ និងមិនបានមេីលថែទេីបក្លាយជាបែបនេះ ។
បច្ចុប្បន្នកម្លាំងនគរបាលនៃអធិការដ្ឋាននគរបាលស្រុកគងពិសីសហការជាមួយកម្លាំងនគរបាលប៉ុស្តិ៍បានធ្វើការឃាត់ខ្លួនជនសង្ស័យនិងកសាងសំណុំរឿងចាត់ការតាមនីតិវិធីច្បាប់ ៕
