សមាជិកសេវាកម្មអាមេរិកចំនួន៣នាក់ ត្រូវបានសម្លាប់នៅក្នុងការវាយប្រហារ ដោយយន្តហោះdroneគ្មានមនុស្សបើក នៅថ្ងៃអាទិត្យនៅប្រទេសគុយវ៉ែត។ បញ្ជាការកណ្តាលសហរដ្ឋអាមេរិក បានប្រកាសពីការស្លាប់នេះ នៅក្នុងសេចក្តីថ្លែងការណ៍មួយ នៅលើប្រព័ន្ធផ្សព្វផ្សាយសង្គម។ នេះជាការបញ្ជាក់ពីការស្លាប់ជាលើកដំបូងនៃទាហានអាមេរិក ចាប់តាំងពីអាមេរិកនិងអ៊ីស្រាអែល បានរួមដៃគ្នាបើកការវាយប្រហារទ្រង់ទ្រាយធំលើប្រទេសអ៊ីរ៉ង់ នៅថ្ងៃទី២៨ខែកុម្ភៈឆ្នាំ២០២៦។
CENTCOMបានឱ្យដឹងបន្ថែមថា អ្នកផ្សេងទៀតក៏បានរងរបួសដែរ ហើយនឹងត្រឡប់ទៅបំពេញកាតព្វកិច្ចវិញក្រោយជាពីរបួសស្រាលៗ។ CENTCOMថា ការធ្វើប្រតិបត្តិការប្រយុទ្ធទ្រង់ទ្រាយធំនៅតែបន្ត។ ស្ថានភាពមានភាពមិនច្បាស់លាស់ ដូច្នេះដោយការគោរពចំពោះក្រុមគ្រួសារ អាមេរិកនឹងលាក់ព័ត៌មានបន្ថែម រួមទាំងអត្តសញ្ញាណរបស់អ្នកចម្បាំងដែលបានស្លាប់ រហូតដល់២៤ម៉ោងបន្ទាប់ពីសាច់ញាតិជិតស្និទ្ធត្រូវបានជូនដំណឹង។
ភ្លាមៗនេះ មិនច្បាស់ទេថាការវាយប្រហារនេះ បានកើតឡើងនៅកន្លែងណា នៅក្នុងប្រទេសគុយវ៉ែត។ ប្រភពមួយបាននិយាយថា ក្រសួងការពារជាតិកំពុងស៊ើបអង្កេត ថាតើយន្តហោះគ្មានមនុស្សបើករបស់អ៊ីរ៉ង់ អាចជ្រៀតចូលប្រព័ន្ធការពារដែនអាកាសដ៏រឹងមាំនោះបានដោយរបៀបណា។
អ៊ីរ៉ង់បានសងសឹកប្រឆាំងនឹងការវាយប្រហាររបស់សហរដ្ឋអាមេរិក និងអ៊ីស្រាអែល ដោយការវាយប្រហារលើគោលដៅយោធាអាមេរិក នៅទូទាំងតំបន់ចាប់តាំងពីថ្ងៃសៅរ៍មក។
ជាមួយគ្នានេះ ប្រធានាធិបតីអាមេរិកលោកដូណាល់ ត្រាំបាននិយាយថា ទំនងជាមានជនជាតិអាមេរិកស្លាប់បន្ថែមទៀត ក្នុងអំឡុងពេលបេសកកម្មប្រយុទ្ធនៅក្នុងប្រទេសអ៊ីរ៉ង់ ដែលលោកបាននិយាយថានឹងបន្តរហូតដល់សហរដ្ឋអាមេរិក សម្រេចបាននូវគោលបំណងរបស់ខ្លួន។
