ខេត្តកណ្តាល៖ព្រឹកថ្ងៃទី២៣ ខែកញ្ញា ឆ្នាំ២០២៦ លោក ជី ស៊ីវុត្ថា នាយករដ្ឋបាលខេត្តកណ្តាល បានដឹកនាំកិច្ចប្រជុំ ស្ដីពីការរៀបចំរបាយការណ៍អនុវត្តការងាររបស់រដ្ឋបាលខេត្ត និងត្រួតពិនិត្យ របាយការណ៍ស្ដីពីវឌ្ឍនភាព និងសមិទ្ធផលសំខាន់ៗរបស់រដ្ឋបាលខេត្តកណ្ដាល ដែលសម្រេចបានគិតចាប់ឆ្នាំ២០២៣ ដល់ឆ្នាំ២០២៦ ក្នុងអាណត្តិទី៧ របស់រាជរដ្ឋាភិបាលកម្ពុជា។កិច្ចប្រជុំនេះមានការអញ្ជើញចូលរួមពីសំណាក់ លោក-លោកស្រី នាយករងរដ្ឋបាល នាយក-នាយករងទីចាត់ការ ប្រធាន-អនុប្រធានអង្គភាពចំណុះរដ្ឋបាលខេត្ត ព្រមទាំងមន្ត្រីរាជការ និងភាគីពាក់ព័ន្ធជាច្រើនរូបទៀត។
ក្នុងឱកាសនោះ លោក ជី ស៊ីវុត្ថា នាយករដ្ឋបាលខេត្ត បានលើកឡើងថា៖ កិច្ចប្រជុំនេះ គឺបូកសរុប វាយតម្លៃ និងប្រមូលផ្តុំទិន្នន័យឱ្យបានគ្រប់ជ្រុងជ្រោយ ដើម្បីឆ្លុះបញ្ចាំងពីលទ្ធផលការងារជាក់ស្តែង វឌ្ឍនភាព និងសមិទ្ធផលធំៗដែលរដ្ឋបាលខេត្តកណ្តាលខិតខំប្រឹងប្រែងសម្រេចបានក្នុងរយៈពេល ៣ឆ្នាំកន្លងមក (២០២៣-២០២៦)។ លទ្ធផលទាំងនេះ គឺជាសាក្សីភាពបង្ហាញពីការរួមចំណែកយ៉ាងសកម្មក្នុងការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ដើម្បីកំណើនការងារ ធានាសមធម៌ បង្កើនប្រសិទ្ធភាព និងរក្សាចីរភាព។
